Eva Bull Holte blei fødd 15. januar 1922 og døydde 15. februar 1993. Ho er gravlagd i Åmotsdal. På 1950-talet kjøpte ekteparet Holte husmannsplassen Sneie i Åmotsdal. Der samla dei etter kvart fleire, gamle, lafta hus i tillegg til dei som sto der frå før av. Eva Bull Holte fann motiv både ute i Europa og heime i Norge. I dei siste åra var det Telemark og særleg fjellheimen i Åmotsdal som gjekk att i bileta hennar. Eva Bull Holte hadde utdanning frå Statens Håndverks- og Kunstindustriskole i Oslo (1940-44), Statens Kunstakademi (1946-49) og Ecole des Beaux Arts i Paris (1948-52). Blant lærarane ho hadde kan nemnast Per Krohg og Jean Heiberg. Blant andre målarar som inspirerte Eva Bull Holte, bør særleg nemnast Cézanne. M. a. Nasjonalgalleriet, Bergen Billedgalleri, Riksgalleriet, Norges Bank, Utenriksdept., Norsk Kulturråd, The National Museum of Women in the Arts i Washington D. C. og Collection Leon Hess i New York har kjøpt inn verk av Eva Bull Holte.